الفة يوسف تكتب:فاصل كروي

نشرت الجامعية الفة يوسف تدوينة فيسبوكية شخصت فيها المشهد السياسي في البلاد ، ننقله لكم كما ورد في صفحتها:

المشيشي تحسّه كيف إلياس بن صالح(مدافع سابق بالنادي الصفاقسي تكررت أخطاؤه بالتسجيل ضد مرماه) ، اختصاصه يمركي ضدّ مرماه…

وقيس سعيّد تحسّه كيف سمير الخميري(مدافع سابق بالترجي)، الكور الكلّ (حتّى لتوّ) يجيبهم البرّه (حتّى ولاّو يعيّطوله سمير شوابس خاطر يضرب الكرة في بلاكة الإشهار)…

والغنّوشي تحسّه كيف هاكالمهاجم اللي يلعب من غير كرة باش يجبد الدّيفونسور معاه، ويخلّي ملاعبي آخر يمركي في بلاصته…

ومحمّد عبّو تحسّه كيف هاكالملاعبي اللي يبدأ على البنك يغلي تقول مارادونا، انت تهبّطه يكوّر وهو يولّي ما يعرفش يعطي حتّى باس صحيحة…

ونبيل القروي تحسّه كيف هاكالملاعبيّة اللّي يبيعو الطّرح للفريق المقابل ليلة الماتش…

والبحيري تحسّه يلعب في كرة اليد ويحبّ يقنعك اللي هو يلعب في كرة القدم…

وعبير موسي تحسّها كيف جمال قرنة(لاعب سابق بالنجم الساحلي عرف بتدخلاته القوية والعنيفة احيانا )  يلصق الملاعبيّة الأخرين ويفدّدهم لين يكرهو النّهار اللي خمّموا يلعبو فيه كرة معاه…

وسيف الدّين مخلوف تحسّه كيف هاكالملاعبي اللي يضرب ملاعبي وياخذ ورقة حمراء، ياخي يكمّل يضرب لاربيتر والصّحافيّين…

والشّعب التّونسيّ تحسّه كيف اللي فريقه خاسر 4 بلاش، وما زال درج لعب، وهو ما زال يتفرّج ويشجّع ثمّاش ما يتقلب الطّرح…