احتجاجا على جماعة السينما: عاطف بن حسين: للعام الثاني ما يستدعاونيش
نشر الممثل والمخرج عاطف بن حسين تدوينة عبر فيها عن غضبه من تجاهل دعوته للعام الثاني على التوالي في أيام قرطاج السينمائية برئاسة مديرها العام نجيب عياد، وقال “شوكو”
أعتذر للأصدقاء في jcc لأني لا أقدر على تلبية دعوتكم و الحضور في حفل الإفتتاح للأسباب التالية :
_ نسكن بعيد في العوينة
_ حالة الطقس (يبدو ان المطر باش تزيد )
_ ما عنديش فيلم مشارك
_ ما نعرفش الباب التيلاني متاع مدينة الثقافة بالرغم الي انا نخدم فيها
_ فمة بهايم و مصطكين و سراق و متمعشين من فلوس الدولة و يعملوا في السينما ما نحبش نراهم
_ الطبيب نبه عليا نبعد على بؤر التوتر
و لذا أنا نعتذر حقيقة ، لأني ممثل تعودت الإقصاء ، و لأني مواطن سأضل شرسا أمام السراق و العرابنية و التفتافة ،، سأبقى ك”الشوكة” في حلوقكم ، و باش نقعد ما نحترمكمش و ما نقدركمش الى يوم يبعثون أو ترجعوا لأحجامكم الطبيعية ،،
كرهتونا في كل شيء ، و صعبتوا علينا الحياة ببهامتكم و قلة معارفكم و رغم إحترامي للبعض (وهاني قلت إحترامي للبعض باش ما تتعداليش تعدي على القطاع بكلو ) الا أني أعرف أغلبكم و أحتقر جهلكم و قلة معارفكم بالسينما و بالصورة ،، أنتم أبعد ما يكون على هذا الوطن ، كمشة قلابة تخدموا في مصالحكم و تلوجوا على تذاكر السفر بين المهرجانات ،،
أنا أعرفكم واحدا واحدا و أعرف بالإسم و اللقب من فسخ إسمي من قائمة المدعوين لأنكم كيف تشوفوني تتذكروا عمايلكم الخامجة ، و تعرفوني نعرف ههههههههههه
واصلوا في ترهدينكم و نجاحاتكم المزيفة و ابداعكم الخالي من الإبداع ،
عاطف بن حسين (ممثل و مبدع يعاني الإقصاء )
ملاحظة : للعام الثاني على التوالي ما يستدعاونيش
