مستحيل نسلّم…مادام مازال في نفس …

9:00 نخلط لتونس من صفاقس، ماشية نعمل في انترتيان .
9:15 نلتقي انا وصاحبتي باصدقاءها في مقهى الحمراء ، غادي اول مانقعد ورايا 3 ولاد يتبلاو، واحد منهم حط ساقو عالكرسي متاعي من تالي، والغايَة تقليل الحياء لا غير . جبدت الكرسي وقدّمت ، قعدو شوي وقاموا 9:30 ، اول واحد فيهم دخل يدو من رقبة مريولي شوي وجبد خيط السوتيان ، وتعدى ، حد مارى الحكاية اما انا بيني وبين روحي منجمش نسكت حتى بالكذب، اذا ماندافعش على روحي يستحيل نجم ندافع عالناس. سبيتو ،صاحبو الاخير فيهم واقف ورايا يعملو قتلك حيوان ويرجعلي وتكتلو عليا بالسّبان
-شكون حيوان ، يا قحبة ، انت تتبلّى علينا ، سكر فمك
-مانسكرش
-راك طفلة
-وانت شنو
-انا راجل وخير منك
– انا خير منك
-سكر فمك لا نضربك. سكر لا نكسرلك فمك راك طفلة والحقيقة مانجمتش نسكت
مد يدو المرة لولا بش يضربني، صاحبتي آسيا جات في الوسط تقلو ماتمسهاش
ثواني نلقاه قريب مني وبدا يضرب فيا على وجهي.. نحاول ندافع على روحي.. ماسيبش ..ندز فيه والاحداث متداخلة والحقيقة برشا تصاور تعداو قدام عيني وكنت من داخل عايشة صدمة وفي نفس الوقت عارفة لي صايرلي من ضرب مهواش حلمة ولا مجرد تخمام ، كان واقع وحقيقة ، ضربني على ساقي بساقو يطيحني قمت ومنيش مسلّمة. قام شدلي شعري وضربلي راسي عالحيط .. غميت ثواني كل شي ظلام في عيني حليت عينيا نلقاهم وصلو للباب.. عياط حس ناس تعيط، يدين متشابكة كراسي داخلة بعضها السرفور خايف على قهوتو من التكسير مش عالبشر .
هزيت ساكي وخرجت نشكي ..
وغادي .. عالم اخر ، حيوط بيض .. فراغ كيما موتي الداخلي.. موظفين يتعاملو مع ارقام مش مع اشخاص.. طمنيت على المحضر مقيد فيه التفاصيل الكل، التهمة : تحرش واعتداء بالعنف ..
في التكسي، واجعتني روحي،نبكي على المرا، على روحي، على تونس، يعمل هكا التكسيست “اسمع وسع بالك، انت من لهجتك مكش تونسية، كان عندك مشكلة ايجا معايا للدار ميسالش” وانا تزيد تشدني البكية اكثر ، من داخل قاعدة نموت بالشوي بالشوي..
ومشيت نعدي في شرنيكول بش نطلع سرتفيكا.. وغادي خوماضة اخرى .. موظف ضرب مالصق “علاه انت بالذات اختاروا يضربوك؟؟ السرتفيكا تبطى ايامات ، اقعد هنا لين تاخوها.. اقعد على خاطري شرايك ، كان ماعندك وين تقعد ايجا اقعد بحذايا ،هات نومروك تو نقرّبلك موعد السرتفيكا.. ” .. مانجمتش نجاوب غير اني نضحك ضحكة هستيرية و ” حتى كان بطات السرتفيكا ايامات ميسالش، مش لازم تاخذ نمرويا” ومشيت..