خرج المنتخب من الربع امام خيول بلد الساحل الافريقي, كيما صار في كان98 ( مع جيل بدرة- الشيحي_الغابسي – التلمساني), وكيما كان 17 ( عبدالنور- فرجاني ساسي- العكايشي) .

انقلاب كروي بوركيني من غاروا نفذو واتارا.. فاهدى المربع الذهبي لبلد فقير تعود على الانقلابات (اعتقال الرئيس كابوري , اسقاط الحكم و حل البرلمان في نقس اسبوع المباراة بواغادوغو و نحن..؟ حصيلتنا هي ببساطة اسوا  من نتيجة النسخة الماضية (19) مع الفرنسي جيراس.

نحن خسرنا 3 من اصل 5 مباريات في امم افريقيا الثالثة و الثلاثين، سبت أسود.. أكثر من نصف الفريق خارج الخدمة..(برون- دراغر-الحدادي- السخيري- بن سليمان- الخزري .) فشل فردي ساهم في الاخفاق الجماعي, و أكثر من هذا و ذاك.. إفلاس تكتيكي،

حدد كل شيء :عندما يعجز اطارك الفني عن قراءة المنافسين, تماما مثلما عجز عن التحضير لماراة مفتاح-البطولة (#مالي) تفاجئنا فنيا و تكتيكيا , و هبطنا بفريق غير متوازن, و خلينا علي  معلول و غيلان و بن رمضان في البنك ..و وجدي و سعد ( كشريدة -بقير) في الدار. وهي مصيبة كبرى …

تفاجئنا و لذلك خرجنا مهزومين في الضغط على المنافس (حصل عكس ذلك), في الثنائيات, في الصناعة الهجومية, في التفطن لقوة بوركينا (كثافة دفاعية, أداء مباشر نحو الامام , وسرعة الانتقال لتطبيق الهجمة السريعة (ترانزيسيون برقية عند بوركينا )

سبت اسود بكل المقاييس صنعنا فيه فرصتين و نصف (منهم كرتين ثابتتين) فنهاية منطقية لسلسلة انتصارات “المدرب الكبير” للمنتخب.. (التى تدوم عادة مباراة واحدة) سجلنا لاعب ( واتارا لوريان الفرنسي) بالقميص 28 عمرو 19 عام. عمل فينا لاعب بالرقم 18 عمرو 22 سنة ( باتسوبا ليفركوزن ).

و ستر ربي الي غاب علينا اللاعب ( تراوري استون فيلا الانجليزي)

هزيمة رؤية المدرب قبل ان تكون هزيمة لاعبين. ناخب وطني زعزعته الضغوطات, لم ينجح في التعامل مع ضغط الشارع و نقد الاعلام. و عصبية عكستها التصريحات و حمراء غامبيا و انطلقت في المنزه مع السحباني..و انتهت في ليمبي بأن مرت ( تعدات ) الى اللاعبين

الكاست غالط يا صديقي.. لانو لدينا مدافع اساسي في الكالتشيو الايطالي خليناه خارج القائمة (كشريدة) و احنا نلعبو بالمثلوثي و دراغر( (راجع من اصابة,وبعشرة بالمئة من امكانياتو),و غالط لانو افضل رقم 10 تونسي تفرج في الكان من دارو في السعودية

( بقير) و غالط عندما لا يتفطن للثنائيات المعطلة/غير الناجعة ( سخيري-عيدوني او خزري-مساكني). وعنا معلول (افضل ظهير في افريقيا مع الاهلي),لكن نلعبو بالحدادي, وعنا غيلان و بن رمضان (متعودين بالافريك, وبجاهزية غيلان القطرية) لكن نلعبو بالعيدوني و بن سليمان..و متمسكين بتركيبة “خط وسط اوروبي/درجة ثالثة”, و يمكن في اطار “الي من برا جاء..في عينك حلا”. و لدينا (نعمة) نعيم , لكن نلعبو بالخزري

و ديما مع الاختيارات..

و لماذا اصبحت جاهزية برون- دراغر-العيدوني-السخيري-الخزري بذلك الضعف و عدم الاستقرار في الاداء؟

النهاية واحدة و معلومة, بعد سوء  توظيف و غياب لهوية خاصة بالمنتخب رغم فترة العامين ونصف منذ تولي المهام الفنية و يبكي الخروف ..

في زمن الحصيلة.. مفيد ان نذكر بان الكورونا في نسخة اوميكرون “ حبت كثيرا “ الكوارجية التوانسه في الكامرون. وهنا سؤال اخر مشروع : لماذا الكوفيد يحب الكوارجية التوانسه فقط.. ؟

ضرب21 لاعبا و نصف الاطار الفني (و حتى الطبيب مريض), وتمارين على 3 مجموعات في 3 اماكن مختلفة, ثم ولا الموضوع تباهي بالاشراف الفني عبر الزوم و الهاتف و العمل عن بعد ( تيلي ترافاي) و كم انت كبير يا سي الكبير

الظروف للجميع, والكامرون ماهيش سويسرا, و كاس افريقيا نلعبو فيها النهائي..مرة كل 20-30 عام ( 65- 96 -2004), و الكوب دافريك هي بالنهاية بطولة ذو طابع بدني لازم تمشيلها جاهز و مسلح بخبرة التدريب مع اندية و منتخبات في مستوى قاري

و دولي..وشوف وشوف رصيد ثقة تقلص بوضوح بين الفريق الوطني و جماهيرو ,

من 13 نوفمبر الماضي و غينيا الاستوائية الى يوم الانقلاب البوركيني. مسافة زمنية خسرنا فيها 6 مباريات في 76 يوم.. و بعد اكثر من عامين ,ما قدرناش نعمل توليفة ثابته متاع تشكيل اساسي, بل دوران بلا نهاية في 11 مركز وصل الى الذروة عندما لعبنا بطولة افريقيا ب24 لاعب..ا

و يبكي الخروف على الظروف.. بما انو لاهين في الوزارة و الوزير (كلمونا ام لا ), و الحكومة (مع المنتخب او ضده) و في اهمية تصريحات “من دربنا لهزم نيجيريا؟ ومن هو المدرب-العرف و المدرب-المساعد (جلال يقول سي منذر عرفي ,و سي منذر يقول جلال محلاه). و نخسرو ايضا عندما نتلهاو بالفايسبوك/التواصل الاجتماعي. و احنا في وسط الكان..نجاوبو في الاعلام و الاعلاميين و لاهين بتصنيف “اشكون معانا (ومع سي وديع)

و اشكون ضدنا (و ضد تونس)”. وعند الرجوع الى قرطاج (المطار) و لينا نحكيو على التحكيم و البينالتي و “جبدنا من العظم فسخ و عاود. توا نشوفو مع جلال. و نعيد من الصفر تقريبا : عشرة اسماء في عشرة سنين (من سامي الى جلال).

و في اخر القصة طلعنا احنا “موريتانيا متاع بوركينا فاصو”. توجع. الله غالب. الحقيقة ديما هكاكه. و راهو بنزرت في القلب. والموضوع عمرو ما يكون شخصي. و للبعض اقول..قليل من الحياء ةوبالدارجة التونسية البنينة الي وليت نشك انكم تفهموها”احشمو شوية”